Maškare – nekad i sad

MESOPUST VA VRBNIKU

Prije su se judi maškarivali na utorek i četrtek. Obelkli bi se va robu ku su našli doma. Škrabausnic ni bilo nego su na glavu davali rubec al klobuk. Na obraz su davali tenku garzu da jih se ne pozniva. Hodeli su po kućah. Judi su njin se veseleli i pogajali ki je ki.

Na nediju se je tancalo na Placi pod sopeli. Tancali su i mladi i stari. Va Domu je bil tanec pod muzikun. Zadnji četrtek-ki se još zove tusti četrtek- je bil maškarani tanec. Dom je bil mal koliko je čudo bilo maškar i judi ki su gjedali. Na četrtek su dičina potezali komoštra. Zadnju nediju mesopusta su divojki obelčivali široke kamižoti.

Ponedijek su mladići hodeli ke divojkan i na kraju bi ih pojeli na Placu udelat kolo.

Utorek mesopusni mladići i muži su hodeli po kućah jeden ke drugomu. Dičina su njin nosili bocunić ze vinon i košić za spravit kobasice i jaja. Večer je bil tanec va Hotelu. Običaj je bil da se divojki i ženi obelku va najlipše vešti.

Sredu su svi hodeli crikvi po popel. Kad bi finila maša, na Placi se je čital tištament. Onda bi zapalili mesopusta. On je bil kriv za sve gerdo i sve nevoje va ton letu.

Pavao Volarić, 3 razred

Odgovori