Svako leto u naše selo prvu subotu potle Tri kralji u dom počinju maškarani tanci.
Na nedilje za vrime mesopusta u dom muži igraju na harte, a dica se maškaraju i igraju. Divojke na četire ure spravljaju igre za dicu ka se natječu za igre u štafeti. Potle redu ča god popit i pojist. Al to još ni gotovo, tek onda počinju igre. Igra se tanac z metlu, pušća se muzika, va celi dom se čuje dičji smih. U večernje ure dica se se spravljaju za poć kućan, al se prvo jave ocan ki još vavik igraju na harte.
Na zadnju nedilju mesopusta va dom se organizira tombula , va ku svaki niš dobi. Na mesopusni ponediljak, na večer muži i žene imaju tanac pud sopele, a mladi se maškaraju. Na mesopusni torak dica redu maškarani u školu, kaj se igraju igre i dobivaju nagrade. Tog dana pridu ranije doma, vide muži ki redu po selu, a kada gredu ća, dica zi svoju kumpanjiju redu po sela, od kuće do kuće. Puten kantaju, smiju se i ćakulaju. Kad pridu u ku kuću zakantaju. Zato dobiju ćikulate, bomboni, jaja, kobasice a kaj god i šoldi. Još ponude pit i kroštuli. Kad zajde sunce svi se sprave kraj doma. Mladići zimaju mužan voz zi pupićen i provivaju ga važgat, a muži in nedaju, love ih i oluže zi lugon. Kašnje ga svi skupa važgaju da gre ća svo zlo ko je nastalo to leto. Žene za to vrime delaju friganju od jaja i kobasice ke su nosile maškare, stare i mlade. Dica podile ča su dobili i onda svi skupa stari i mladi pojidu, zakantaju i zatancaju po staro pud sopele. Žene sve sprave i redu doma zi dicu, a muži najkašnje pridu doma do 11:30. Sve utihne aš je mesopust gotov i počinje korizma.
Dica prije polnoći misle u ča će se maškarat drugo leto. Dal će bit stare babe, lipe tete ili pak dobri i dragi političari. Ča god da se maškaraju, znaju da se tradicija ne prekida i da će njin maškarano doba vavik ostat u lipome sjećanju. Da će te uspomene, ako Bog da, prepričavat svojin dican, a oni svojin. Tako se nikada neće zatrt naša tradicija grde maškare.
Ana – Maria Sarić
- razred